प्रभारी मुख्य अभियंता महेश महाजन यांच्या हस्ते सपत्नीक सत्कार

परळी औष्णिक विद्युत केंद्रातील सहाय्यक अभियंता सुभाष पसारे यांचा निरोप समारंभ 

प्रभारी मुख्य अभियंता महेश महाजन यांच्या हस्ते सपत्नीक सत्कार

परळी / प्रतिनिधी:

    औष्णिक विद्युत केंद्र, परळी येथील कोळसा हाताळी विभागातील वाहन दुरुस्ती विभाग-१ चे सहाय्यक अभियंता सुभाष आनंदराव पसारे यांना २७ फेब्रुवारी रोजी सायंकाळी ५ वाजता प्रशासकीय कार्यालयातील सभागृहात आयोजित सेवापूर्ती कार्यक्रमात निरोप देण्यात आला. श्री. पसारे यांनी परळी येथे महाजनकोला एकूण २७ वर्षे सेवा दिली. त्यांना दोन मुले असून, त्यांचा मुलगा आदित्य याने बी.टेक. पूर्ण केले आहे. या सेवानिवृत्त अधिकाऱ्याचा प्रभारी मुख्य अभियंता महेश महाजन यांच्या हस्ते सपत्नीक सत्कार करण्यात आला.

याप्रसंगी बोलताना महेश महाजन म्हणाले की, "प्रत्येकाने आपल्या कर्तव्यासोबतच सामाजिक आणि कौटुंबिक बांधिलकी जोपासली पाहिजे." प्रभारी उपमुख्य अभियंता हिम्मतराव अवचार यावेळी बोलताना म्हणाले की, "माणुसकीचा भाव जोपासणारे तसेच खऱ्याला खरं आणि खोट्याला खोटं म्हणणारे, अशी सुभाष पसारे यांची ओळख होती." या निरोप समारंभास प्रभारी उपमुख्य अभियंता हिम्मतराव अवचार, अधीक्षक अभियंता धनंजय कोकाटे, अधीक्षक अभियंता सुरेश गर्जे, अतिरिक्त कार्यकारी अभियंता शाहूराव होते, कार्यकारी अभियंता मदन पवार, अतिरिक्त कार्यकारी अभियंता आरोले, उपकार्यकारी अभियंता शिवाजी होटकर, कुंदन राठोड, वाघ, तसेच मानव संसाधन विभागाचे महादेव वंजारे आदींची उपस्थिती होती. या कार्यक्रमासाठी कोल्हापूर, पारस, भुसावळ आणि नागपूर या ठिकाणांहून त्यांचे मित्र व सहकारी उपस्थित होते.कार्यक्रमाच्या सुरुवातीस सेवानिवृत्त अधिकाऱ्याच्या जीवनप्रवासावर आधारित एक चित्रफीत दाखवण्यात आली. कार्यक्रमाचे सूत्रसंचालन राजू गजले यांनी केले, तर उपस्थितांचे आभार सहाय्यक कल्याण अधिकारी शरद राठोड यांनी मानले.