माजलगाव शहरातील खंडोबा मैदान परिसरातील घटना

झोका खेळताना गळफास बसून नऊ वर्षाच्या चिमुकलीचा दुर्दैवी मृत्यू

माजलगाव ,प्रतिनिधी.... घरातील झुल्याला बांधलेला झोका खेळण्यासाठी मुलगी गेली असता  झोका खेळताना गळ्याला अचानक फास बसून एका  नऊ वर्षीय चिमुकलीचा दुर्दैवी अंत झाल्याची घटना  माजलगाव शहरात घडली. वृंदा समीर रुद्रवार असे या चिमुकलीचे नाव आहे, या घटनेने सर्वत्र हळहळ व्यक्त होत आहे. 

       शहरातील व्यापारी प्रदीप रुद्रवार यांचे खंडोबा मैदान परिसरात घर आहे. मंगळवारी महावीर जयंतीची सुट्टी असल्याने त्यांची नात वृंदा वय ,९ वर्ष ही आपल्या घरातील वरच्या मजल्यावर असलेला झुला खेळण्यासाठी आपल्या छोट्या बहिणीसह वर गेली तेथे खुर्चीवर चढून झोका हातात घेत असताना झोक्याचा तिला गळफास बसला व खुर्ची खाली कलंडली त्यातच तिचा मृत्यू झाला. आपली मुलगी जेवण्यास खाली का येत नाही हे पाहण्यासाठी तिची आई वर आली असता तिला मुलीला गळफास बसल्याचे दिसताच तिने हंबरडा फोडला. तातडीने तिचे आजी, आजोबा,वडील आले व त्यांनी तात्काळ वृंदाला हॉस्पिटलला नेले मात्र तोपर्यंत वेळ निघून गेलेली होती. चुणचुणीत व गोंडस अशी वृंदा येथील ईगलवुड शाळेत दुसरी वर्गात शिकत होती. तिचा असा अचानक दुर्दैवी मृत्यू झाल्याने रुद्रवार परिवारावर शोककळा पसरली असून सर्वत्र हळहळ व्यक्त होत आहे या घटनेचे वृत्त  कळताच नातेवाईक व लोकांनी मोठी गर्दी केली.