परशुराम जन्मोत्सवा निमित्ताने विविध उपक्रमांचे आयोजन...

लातूरमध्ये गृहउद्योग प्रदर्शनीचे परळीच्या नगराध्यक्षा सौ. पद्मश्री बाजीराव धर्माधिकारी यांच्या हस्ते उत्साहात उद्घाटन

महिलांच्या आर्थिक स्वातंत्र्यासाठी 'ब्रँडिंग' आवश्यक - नगराध्यक्षा सौ.पद्मश्री धर्माधिकारी

लातूर: प्रतिनिधी...

       महिलांमध्ये उपजतच उत्तम व्यवस्थापन कौशल्य असते. त्यांच्या घरगुती उत्पादनांना जर योग्य बाजारपेठ आणि ब्रँडिंगची जोड मिळाली, तर त्या जागतिक स्तरावर आपले नाव कोरू शकतात. अशा प्रदर्शनांमुळे महिलांच्या आत्मविश्वासाला खऱ्या अर्थाने बळ मिळते असे प्रतिपादन परळी वैजनाथ नगर परिषदेच्या अध्यक्षा सौ. पद्मश्रीताई बाजीराव धर्माधिकारी यांनी केले. 

      परशुराम जन्मोत्सव समिती-२०२६ आणि बीबीएन महिला मंडळ, लातूर यांच्या संयुक्त विद्यमाने औसा रोडवरील कल्पतरु मंगल कार्यालय येथे आयोजित 'गृहउद्योग प्रदर्शनी'च्या उद्घाटन प्रसंगी त्या बोलत होत्या. शुक्रवारी मोठ्या उत्साहात या प्रदर्शनीचे उद्घाटन संपन्न झाले. सौ पद्मश्रीताई. धर्माधिकारी यांनी पुढे बोलतांना सांगितले की, केवळ चूल आणि मूल यात न अडकता महिलांनी आपल्या छंदाचे रूपांतर व्यवसायात केले पाहिजे. परशुराम जन्मोत्सव समितीने महिलांसाठी उपलब्ध करून दिलेले हे व्यासपीठ कौतुकास्पद असून, यामुळे स्थानिक उत्पादनांना मोठी चालना मिळेल. या प्रदर्शनीमध्ये विविध महिला बचत गटांनी तयार केलेले मसाले, घरगुती लोणची, हस्तकला, सुती कपडे आणि सजावटीच्या वस्तूंचे स्टॉल्स आकर्षणाचे केंद्र ठरले होते. लातूरकरांनी या प्रदर्शनीला भेट देऊन महिला उद्योजिकांचे कौतुक करावे असे आवाहन त्यांनी केले..

      परशुराम जन्मोत्सव समितीचे संस्थापक अध्यक्ष ॲड. संजय पांडे यांनी प्रास्ताविकात या आयोजनामागची भूमिका स्पष्ट केली. कार्यक्रमाच्या यशस्वीतेसाठी बीबीएन महिला मंडळ आणि परशुराम जन्मोत्सव समितीच्या कार्यकर्त्यांनी परिश्रम घेतले. या सोहळ्याला लातूरमधील नागरिक आणि महिला मोठ्या संख्येने उपस्थित होते.