परळीकरांचा बहुमान वाढवला...... मैथिली चे सर्व स्तरातून अभिनंदन

 परळीच्या लेकीचा कलाविष्कार पाहून पुणेकर रसिक भारावले : मैथिली लोंढे यांना पुण्यात 'ललना कलारत्न पुरस्कार' प्रदान

परळी वैजनाथ/ प्रतिनिधी.....

जागतिक महिला दिनाचे औचित्य साधून पुण्याच्या निवेदिता प्रतिष्ठानच्या वतीने आयोजित करण्यात आलेल्या दिमाखदार सोहळ्यात परळीची युवा कलाकार मैथिली बाळकृष्ण लोंढे हिला मानाचा 'ललना कलारत्न पुरस्कार २०२६' देऊन गौरविण्यात आले.

पुण्यातील प्रसिद्ध बालगंधर्व रंगमंदिर येथे महिला कलाकारांसाठी आयोजित या विशेष कार्यक्रमात मैथिलीच्या कलागुणांचा सन्मान करण्यात आला. या सोहळ्याचे मुख्य आकर्षण ठरले ते मैथिलीने स्टेजवर सादर केलेले थेट चित्रकला प्रात्यक्षिक अत्यंत कमी वेळात तिने हिंदी चित्रपटसृष्टीतील सौंदर्याची खाण 'मधुबाला' यांचे हुबेहूब चित्र कॅनव्हासवर साकारले. परळीच्या या लेकीचा कलाविष्कार पाहून उपस्थित पुणेकर रसिक आणि मान्यवर भारावून गेले. टाळ्यांच्या कडकडाटात तिला हा पुरस्कार प्रदान करण्यात आला. पुरस्काराला उत्तर देताना मैथिली म्हणाली की, "निवेदिता प्रतिष्ठानसारख्या संस्थेकडून कलेची पोचपावती मिळणे ही माझ्यासाठी आणि माझ्या परळी शहरासाठी अभिमानाची बाब आहे." या यशामुळे मैथिलीवर परळी वैजनाथ व परिसरातून अभिनंदनाचा वर्षाव होत आहे.